發表主題 回覆文章
Brian Sham
XXX.XXX.99.68

發表發表於: Sun May 22, 2016 3:10 am
1#

廣告贊助 [隱藏]
我今年3月結婚,喺九龍灣美心皇宮擺酒席。因為親友唔多,自己又唔想大搞,想大家一齊食餐好嘅,一齊開心,所以冇擺得多,只係擺左五圍,加左錢大家食好d咁。

本身晏晝喺拉婓特行禮好開心,親友都對場地安排同服務大讚不絕。到晚上嚟到美心皇宮,簡直係大災難!!! Sad

以下真人真事,句句屬實。大家考慮幫襯嘅時候,真係要用心睇埋落去! Exclamation Exclamation Exclamation

我地一家人本來好中意美心,個個星期去飲茶。所以我結婚,諗都冇諗其他酒樓就決定左呢間。一月左右,我Daddy Mommy同埋我未婚妻,一齊去左問擺酒嘅嘢。當時廖經理(事後發現佢根本唔係乜嘢經理)態度好到冇得彈,我地要求乜佢有乜,甚至主動提供我地冇要求嘅嘢:

——可唔可以有間隔(其實呢個係好正常吧!)?,佢話有。
——會有幾大?佢話:有三盞水晶燈咁多嘅空間。
我地望一望,其實都幾闊落。咁好啦,空間冇問題啦。之後,
——咁會唔會有斟茶用嘅嘢?佢話:當然有!我地會提供紙杯,茶,軟墊。
——我地可唔可以有個好細個嘅台仔?(我地指嘅當然只係得一級仔果d迷你台仔,始終我地又唔係大搞)佢話,當然有!你地影相用嘛。

其他details都搞好啦。喺結婚前一個月左右,我老婆話,不如晚宴都租條裙,靚d嘛咁。好,咁我地就打電話俾廖經理,問,可唔可以隔少少空間俾新娘換一換裙,始終唔想喺廁所換。佢話,會有少少隙。我地話唔介意。

----------------------------------------

到結婚果日,夜晚到到酒樓嘅時候,簡直嚇死我地所有人。 Confused 首先,喺門口望入去,一個牌用嚟指示嘅都冇。行入去揾完一輪,終於喺廁所出面條冇燈嘅走廊見到A4紙咁大嘅「x府宴客」。小事,算。。。

入到去,超細!!!!!d枱疊起左先有位打麻雀。賓客冇位坐。「新娘房」僅僅夠個新娘坐入去,着左裙簡直行唔過咁濟。化妝師攝入去先化到妝,行都行唔到!算。。佢冇應承過「新娘房」有幾大。但係成個場地就只見到兩盞水晶燈,根本唔係講好嘅三盞。我地揾廖經理出嚟傾,佢嘅回覆係:

「你地擺得5圍,唔係婚宴,我地冇可能俾三盞水晶燈嘅空間你。」

唔係婚宴?!冇可能三盞?!WTF?

「三盞起碼擺10圍先有。」

10圍?你擺到而唔似大排檔我真心佩服!

我地當時冇再就呢個問題嘈落去。大喜日子免傷和氣。

然後另一個問題出現。個reception位就喺廁所門口!本來我地個reception位俾左隔離場地用!!

都算。唔係大問題。向佢提出左,冇反應,我地都冇繼續嘈。

然後我細佬拎隻手指俾佢播我地d結婚相,想俾d賓客睇,分散下注意力啦下。。

「我地播唔到手指喎!」
「下,咁播乜?」
「DVD囉。」
「我琴日先拎手指嚟俾你地播過。」
「播手指要用隔離場嘅機,一係我依家借住俾你地用住先,你7點半要停。」
當時7點。。。

到最後,手指播唔到。大家聽住Kelly Clarkson嘅Because of You同What doesn't kill you makes you stronger嚟影合照。。

好。說好的台仔呢?

廖經理用翻佢嘅神回覆:「你地搞嘅唔係婚宴,我地俾唔到台仔你。」

好,咁影相時其他賓客坐邊呢?你地又疊d枱疊到人咁高,椅又收埋晒。

我細佬着住老西自己一個抬左廿幾張椅出嚟排。侍應呢?佢睇人影相睇得仲enjoy過我。

講真,美心嘢食一向唔差。我呢樣都要講番。但係服務同態度呢?只能講我呢一世仔冇咁俾人侮辱過。
----------------------------------------

事後,賓客走晒之後,我地亦執好嘢嘅時候,兩位成餐飯都冇出現過嘅經理就出現啦!仲晒冧,話今日招呼唔到,搏俾貼士喎。我當時真係想鬧人,但係我老婆制止左我。我呀媽同細佬就好有禮貌咁數佢地不是,仲當面問投訴熱線。

第二日,我地去左洞蜜月。我細佬就代表我打左去辦公室投訴。個PR簡直又係另一個公關災難。答行貨,仲要吞吞吐吐,成個中學生考individual response咁。敷衍了事。之後佢地再打嚟,話,原來當日隔離有場大活動,人地擺左唔知幾多十圍,所以先張我地d嘢搬歪晒,d音響冇得用。哦!一天光晒!原來要賺大錢!我細佬就同佢講,你要賺大錢唔做生意咪出聲!我地大可以揾過第二間!佢又話,今次係佢地失當呀,會寫入紀錄咁。

寫入紀錄?Are you fxxking kidding me? 想咁了事?咁個經理又可以繼續咁呃人啦喎!佢話:第時考慮升職時會再睇翻record。。。

哦。。美心原來係咁做嘢嘅。佢地收線之後,我細佬再打去講咁我地會上網同大家講我地嘅遭遇。

佢地隔左陣打嚟:「為表示歉意,我地想送翻隻乳豬俾你。」講真,場一生人一次嘅婚宴俾你地搞到咁我食你地d肉都冇味,況且我食回門果d乳豬已經食到想嘔。

佢話要再同公司傾傾,一排之後打嚟:「我地好慎重咁研究過,不如我地送翻4盒蝦子麵俾你地做賠償。」

4盒蝦子麵。。不如我送翻40盒鮑魚麵俾你叫你同我重新再搞過場婚宴吖!

之後佢地再打嚟,話送現金券。其實講真,我地咁之後真係已經對美心冇晒信心,現金券真心冇用。我地亦唔係貪心嘅人,由頭到尾我地只係想廖經理出嚟承認事實同你地對佢作出適當處分,以免佢再為左做生意而去呃其他人。我地一生人一次嘅事俾佢搞衰晒,呢間公司仲要無理包庇,仲要敷衍我地,直到我地話上網反映事實先將事情認真看待。但到最後,我地要求嘅小小事,都係冇。我地係受害者,大家如果有考慮過去呢度擺酒嘅,真係忠告大家千奇唔好呀!我喺呢度所寫嘅句句屬實,佢地公司亦有紀錄。大家真係唔好再重蹈我地嘅覆轍,俾美心呃!
回頂端